OpenAI အတွင်းပိုင်းမှ တင်းမာမှု- IPO အချိန်ဇယားအပေါ် CEO နှင့် CFO တို့ သဘောထားကွဲလွဲနေခြင်း

 

OpenAI အတွင်းပိုင်းမှ တင်းမာမှု- IPO အချိန်ဇယားအပေါ် CEO နှင့် CFO တို့ သဘောထားကွဲလွဲနေခြင်း

Research by LH 

ကုန်ကျစရိတ်များ မြင့်မားလာခြင်းနှင့် AI နယ်ပယ်အတွင်း ပြိုင်ဆိုင်မှု ပြင်းထန်လာခြင်းတို့ကြောင့် OpenAI ကုမ္ပဏီကို အများပိုင်အဖြစ် ပြောင်းလဲရန် (IPO) ကြိုးပမ်းရာတွင် CEO Sam Altman နှင့် CFO Sarah Friar တို့အကြား မဟာဗျူဟာမြောက် သဘောထားကွဲလွဲမှုများ ပေါ်ပေါက်နေသည်။

OpenAI ကို ကမ္ဘာ့ AI ပြိုင်ပွဲတွင် ထိပ်တန်းသို့ ပို့ဆောင်ပေးခဲ့သည့် Altman သည် ၂၀၂၆ ခုနှစ်အတွင်း IPO စတင်ရန် တွန်းအားပေးနေကြောင်း သတင်းများက ဆိုသည်။ ၎င်းသည် ရင်းနှီးမြှုပ်နှံမှု အမြောက်အမြား ရယူရန်၊ အခြေခံအဆောက်အအုံများ တိုးချဲ့ရန်နှင့် Google DeepMind၊ Anthropic ကဲ့သို့သော ပြိုင်ဘက်များကို ကျော်ဖြတ်ကာ OpenAI ၏ ရပ်တည်မှုကို ခိုင်မာစေရန် ရည်ရွယ်ခြင်းဖြစ်သည်။

Altman ၏ အမြင်အရ အရှိန်အဟုန်ဖြင့် တိုးချဲ့ရန်မှာ အလွန်အရေးကြီးသည်။ OpenAI အနေဖြင့် ဒေတာစင်တာများ၊ ချစ်ပ်ပြားများနှင့် စွမ်းအင်ကဏ္ဍတို့တွင် ဒေါ်လာဘီလီယံ ရာနှင့်ချီသော ရင်းနှီးမြှုပ်နှံမှုများ လိုအပ်မည်ဖြစ်သည်။ Altman အတွက်မူ အချိန်သည် အဓိကဖြစ်ပြီး စောစီးစွာ အသာစီးရယူနိုင်ခြင်းသည် AI စက်မှုလုပ်ငန်း၏ ရေရှည်တည်ဆောက်ပုံကို ဆုံးဖြတ်ပေးမည်ဟု ယူဆထားသည်။

သို့သော်လည်း Nextdoor နှင့် Square ကုမ္ပဏီတို့တွင် CFO အဖြစ် တာဝန်ယူခဲ့ဖူးသည့် Sarah Friar ကမူ ပိုမိုသတိထားသည့် သဘောထားရှိသည်။ ကုမ္ပဏီအနေဖြင့် လူထု၏ စောင့်ကြည့်စစ်ဆေးမှုများ ရှိလာမည့် အများပိုင်စျေးကွက်အတွင်းသို့ ဝင်ရောက်ရန် ဘဏ္ဍာရေးနှင့် လုပ်ငန်းလည်ပတ်မှုပိုင်းအရ အသင့်ဖြစ်၊ မဖြစ်အပေါ် သူမက စိုးရိမ်မှုများရှိနေကြောင်း သိရသည်။

သူမ၏ စိုးရိမ်မှုများတွင် ငွေကြေးအမြောက်အမြား သုံးစွဲနေရမှု၊ ခန့်မှန်းရခက်သော ဝင်ငွေတိုးတက်မှုနှင့် OpenAI ၏ ရှုပ်ထွေးသော ဖွဲ့စည်းပုံကို အများပိုင်ရင်းနှီးမြှုပ်နှံသူများနှင့် ကိုက်ညီအောင် ပြောင်းလဲရန် ခက်ခဲမှုတို့ ပါဝင်သည်။ Friar က ၂၀၂၇ ခုနှစ် သို့မဟုတ် ၎င်းနောက်ပိုင်းမှသာ IPO ပြုလုပ်ခြင်းက ကုမ္ပဏီ၏ ဘဏ္ဍာရေးပုံစံကို တည်ငြိမ်စေပြီး စီမံခန့်ခွဲမှုစနစ်ကို ပိုမိုအားကောင်းစေမည်ဟု အကြံပြုထားသည်။

ဤကွဲပြားသော အမြင်များသည် လျင်မြန်စွာ တိုးတက်နေသော နည်းပညာကုမ္ပဏီများတွင် ကြုံတွေ့ရလေ့ရှိသည့် အခြေအနေတစ်ခုပင် ဖြစ်သည်။ ယင်းမှာ ရှေ့ဆောင်အမြင်ဖြင့် တိုးချဲ့လိုစိတ်နှင့် ဘဏ္ဍာရေးဆိုင်ရာ စည်းကမ်းစနစ်တို့အကြား ဟန်ချက်ညီအောင် ထိန်းညှိနေရခြင်းဖြစ်သည်။ Altman ၏ ချဉ်းကပ်မှုက နည်းပညာပြိုင်ပွဲတွင် အနိုင်ရလိုသည့် အားထုတ်မှုကို ဖော်ပြနေပြီး Friar ၏ ရပ်တည်ချက်က ရေရှည်တည်တံ့မှုနှင့် ပွင့်လင်းမြင်သာမှုကို ဦးစားပေးသည့် အဖွဲ့အစည်းဆိုင်ရာ ရင်းနှီးမြှုပ်နှံသူများ၏ မျှော်လင့်ချက်နှင့် ကိုက်ညီနေသည်။

ယခုအချိန်သည် OpenAI အတွက် အရေးကြီးသော အလှည့်အပြောင်းဖြစ်သည်။ ChatGPT ကဲ့သို့သော ထုတ်ကုန်များဖြင့် အောင်မြင်မှု ရနေသော်လည်း လုပ်ငန်းလည်ပတ်မှု ကုန်ကျစရိတ်များမှာ တိုးမြင့်နေဆဲဖြစ်သည်။ IPO သို့ ဦးတည်လိုက်သည်နှင့် ကုမ္ပဏီသည် သုံးလပတ်အလိုက် ဘဏ္ဍာရေးစစ်ဆေးမှုများနှင့် တင်းကြပ်သော စည်းမျဉ်းများအောက်သို့ ရောက်ရှိသွားမည်ဖြစ်သည်။

အတွင်းပိုင်း သဘောထားကွဲလွဲမှုများ ရှိနေသော်လည်း လေ့လာသူများက ယင်းမှာ သဘာဝကျသည်ဟု ဆိုကြသည်။ "ဒါဟာ ပုံမှန်တွေ့နေရတဲ့ အားပြိုင်မှုပါပဲ။ စျေးကွက်သစ်တခု ဖန်တီးဖို့ ရဲရင့်တဲ့ ခေါင်းဆောင်မှု လိုသလို၊ အဲဒီစျေးကွက်မှာ ရှင်သန်နိုင်ဖို့အတွက် ခိုင်မာတဲ့ ဘဏ္ဍာရေး စည်းကမ်းလည်း လိုအပ်ပါတယ်" ဟု လုပ်ငန်းကျွမ်းကျင်သူ တဦးက မှတ်ချက်ပေးသည်။

လက်ရှိအချိန်ထိ OpenAI ဘက်မှ IPO အချိန်ဇယားနှင့် ပတ်သက်၍ တရားဝင် ထုတ်ဖော်ပြောကြားခြင်း မရှိသေးပေ။ OpenAI အနေဖြင့် အများပိုင်စျေးကွက်သို့ အလျင်အမြန် ဝင်ရောက်မည်လား သို့မဟုတ် ပိုမိုသေချာသော လမ်းစဉ်ကို ရွေးချယ်မည်လား ဆိုသည်မှာ လာမည့်လများအတွင်း မြန်နှုန်းနှင့် တည်ငြိမ်မှုတို့အကြား မည်သို့ ညှိနှိုင်းဆောင်ရွက်မည်ဆိုသည့် အပေါ်တွင် မူတည်နေမည်ဖြစ်သည်။